是的，是斥責。公開信第一句就是「王維基！我要鬧爆你！！」林鱻豐，自稱是香港電視飯堂廚師。他表示:「我係香港電視裡面一個最基層嘅員工，我並唔係負責創作，亦唔係負責拍劇，更加唔係負責化妝，我只係公司職員canteen裏面一個負責煮飯嘅員工，我實在係睇唔過眼，所以對唔住我決定要響度鬧爆你。」如何鬧爆？請看下文：
「你到底識唔識做生意0架，你知唔知你其實唔使蝕咁多0架！你知唔知你請啲員工返嚟，原本唔使俾咁多錢0架！佢哋做創作嘅，為咗追尋夢想，都習慣咗一邊食麵包或者杯麵一邊做創作啦！點解你要俾佢哋有溫飽？點解你要俾佢哋知道佢哋嘅自身價值，要俾佢哋知道編劇仔都可以有尊嚴。佢哋三餐冇溫飽喺啲大台都習慣0架啦！」
「你又知唔知你買嘅拍攝器材係唔使咁貴0架！你用到蔡司鏡頭咁高級，你係咪唔知嗰啲係用嚟拍電影0架！你用其他電視台用嚟拍劇嘅你知唔知可以慳好多！啲觀眾只會覺得畫面靚咗，鬼知你用到咁高級咩！」
「你知唔知你將一套拍咗十幾廿集嘅劇集，為咗緊湊同節奏感而將佢cut到淨番9集，你知唔知浪費咗幾多錢同時間呀？你咪由得啲觀眾睇垃圾囉！啲觀眾咁多年都係咁0架啦！咪由得佢哋繼續雞汁送飯囉！」
「仲有，你飯堂賣到啲嘢咁平做乜？16蚊個快餐，23蚊個即炒小菜，仲要跟埋嘢飲，仲冇得我用味精，你當呢度係善堂呀？咪由得D職員喺出邊食味精捱貴飯囉！」
「仲有嗰啲劇組飯，點解要堅持三餸一湯日日唔同款，咪由得佢哋喺出邊餐餐燒味飯囉！都唔知你請我返嚟做乜？上面我所講嘅只係冰山一角，但如果你做嘢求其啲，少啲理其他人感受，唔需要咁多創新，少啲執著，少啲良心，你知唔知你已經唔使蝕9億幾，分分緊一半都搞掂。」
「最後到我自己喇！你俾我返朝8晚6，一個星期有一日星期六／日放假，你知唔知我做飲食係甚少返咁好嘅時間，我多咗好多時間陪屋企人。我以前不嬲個女返咗學我先起身、放工個女就一早瞓咗，想見下都冇，星期六／日想陪吓啲仔女去街就更加唔使旨意。你俾咁好時間我你叫我點返轉頭，我點捨得呢份工？」
「你一定要盡快搞掂個牌，記得揾返我，我一定會返嚟！到時慢慢同你計。
一個小職員上」
沒有留言:
張貼留言