四哥老馬有火

無綫噚晚首播由謝賢（四哥）﹑胡楓（修哥）及Joe Junior主持嘅旅遊節目《三個小生去旅行》，節目被指取材自韓國節目《花樣爺爺》，只係略改一啲形式，就成為自家創作。呢三位加埋225歲嘅小生，是次行程為14天，佢哋會由香港坐飛機經過土耳其伊斯坦堡，去到西班牙巴塞隆拿，之後再坐火車去馬德里及西維爾，最後行程係葡萄牙里斯本。

噚晚播出部份拍攝花絮，修哥﹑四哥及Joe Junior似三個老頑童，喺節目中唱歌﹑互寸互窒﹑大擺Chok甫，令人笑破肚皮，其間佢哋要入住青年旅舍兼食飯盒，四哥坦言：「好過TVB飯盒。」Joe Junior就話：「TVB飯盒改進咗啦﹗」

噚日播出佢哋推行李﹑洗衫一腳踢﹑N個難忘經驗﹑同街頭賣唱藝人唱歌﹑駕船睇日落以及下廚等部份片段，認真Happy﹗

不過今日網上卻離奇流出一段鏡頭以外15秒「花絮」，四哥向Joe Junior爆粗﹗片段中四哥以英文同疑似酒店人員交談，四哥話：「let them inside...two of them!」之後四哥就急急叫Joe Junior及修哥上車，而Joe Junior本想「敬老」讓修哥上車，豈料四哥此時不耐煩爆粗：「上啦上啦X你老X快啲嘛﹗」