事緣一名疑似內地公關嘅「俊賢_娛樂大文化」，喺微博問錢國偉、屬施念慈旗下嘅藝人曾善美(Mei Mei)係唔係《喜愛夜蒲3》嘅女主角？佢話有人向佢公司推介用呢個女仔，錢國偉即否認話：「曾善美不是女主角，她只是客串過幾秒鏡頭！」點知仍然有人上當，噚日又有以曾善美做《夜蒲3》女主角嘅海報出現，宣傳8號(即噚日)嘅酒吧騷。錢國偉即刻話：「為何在香港經理人施念慈旗下的藝人，也會做我們一直討厭的事。欺騙觀眾虛假事實，是當內地觀眾好騙！」
噚日致電錢國偉了解，佢餘怒未消謂：「之前有曾寶玲同AD2借《夜蒲》個名宣傳，成張poster都出咗，我唔信佢（施念慈）公司冇人監察。」佢又話當初DaDa失蹤，施念慈哀求保留Celia K.嘅角色，錢導謂：「DaDa淨係同彭浩翔講生日快樂，其他監製、導演就講句對唔住，我同伍健雄都有名0架，我覺得自己有中度情緒病呀！」
施念慈公司加秀娛樂嘅下屬Rosa為平息風波，於錢國偉微博留言，強調海報係未經審核，已要求酒吧更換；事實上曾善美上月底連接兩個內地登台騷，海報均以《夜蒲》作招徠。至於施念慈就喺電話度話；「叫咗內地酒吧處理，亦都好多謝導演指正我哋。至於其他人講乜就控制唔到。」
沒有留言:
張貼留言