馬賽同性密友

近日馬賽被爆喺無綫十萬火急之際，竟然請兩個月假缺席無綫一年一度大型亮燈儀式，但就去同同性密友汪子琦去歐遊，玩盡法國同意大利等國家。而汪子琦就係前郭可盈經理人，佢09年涉嫌向外發放疑似林文龍偷食電話錄音，可盈兩公婆即開記招澄清，可盈更指有人敲詐，搞到滿城風雨。

今日馬賽就喺尖沙咀出席高蹺活動，問到佢同同性密友汪子琦歐遊，佢受訪時每次都話報道「斷章取義」同埋「時間會證明一切」去回應。

講到請假歐遊冇去無綫亮燈，佢話:「亮燈都去咗，搵返真係有去o架。」繼而問返佢歐遊件事，佢不斷話:「呢個報道我都唔想回應啦，而家唔同工作有關嘅嘢就唔想回應。」咁係咪同汪子琦去旅行?佢話:「其實仲有其他朋友。」

講到佢好似同性密友都可以一齊，佢又話:「其實我就真係唔想回應，好多報道都斷章取義，時間會證明一切，我係一個咩人，究竟件事係點，時間會話比大家知。」

咁唔介意同同性拍拖?馬賽又話:「好多報道都係斷章取義，所以真係唔回應，因為成件事影響他人feel sorry。」

點形容同汪子琦嘅關係呢?佢再講:「我真係唔想再影響他人啦，我係娛樂圈中人，但已經影響到我個朋友，影響到佢，一齊去嘅朋友，唔好意思。」唔否認即係承認?馬賽又再話:「我真係唔想回答，寫出嚟都唔係真實嘅事，我入行唔算好耐，但好多次報道都係咁樣，我唔想再俾人炒作。」

記者問到佢咁灰咁失望，會唔會想退出娛樂圈?佢大笑話:「咁又未至於，講咩都冇用，都有話題去寫，有方式去寫。」咁介唔介意同同性拍拖先?佢就話:「我身邊有啲咁嘅朋友，我覺得要尊重。」